Прагна рвуся з усіх сухажылін,
Каб праскочыць, паспець да пары!
Атачылі мяне! Акружылі!
Гоняць весела на нумары!

Там з-за елак гучаць дубальтоўкі.
Паляўнічы хаваецца ў цень.
Там ваўкі снегам крохкім і коўзкім
Скачуць, быццам жывая мішэнь...

Там паляванне на ваўкоў! Там паляванне!
Ату драпежнікаў, старых і шчанюкоў!
Крычаць загоншчыкі, шалеюць псы ў браханні!
На снезе кроў і плямы яркія флажкоў...

Не на роўных гуляюць з ваўкамі
Леснікі, ды рука не дрыжыць.
Абцягнуўшы нам волю флажкамі,
Б’юць надзейна! А хочацца жыць!

Воўк не можа парушыць традыцый,
Бо ў дзяцінстве сляпым шчанюкі -
Ваўчаняты, мы ссалі ваўчыцу
І ўсмакталі табу за флажкі!

Там паляванне на ваўкоў! Там паляванне!
Ату драпежнікаў, старых і шчанюкоў!
Крычаць загоншчыкі, шалеюць псы ў браханні!
На снезе кроў і плямы яркія флажкоў...

Ногі хуткія, моцныя скулы!
Дык чаму ж мы, з якой мы тугі
Зацкавана імчымся пад кулі,
Не спрабуючы праз ланцугі?

Воўк не можа супроць выхавання!
Вось канчаецца час мой ужо!
Той, якому я наканаваны,
Усміхнуўся, узняўшы ружжо...

Там паляванне на ваўкоў! Там паляванне!
Ату драпежнікаў, старых і шчанюкоў!
Крычаць загоншчыкі, шалеюць псы ў браханні!
На снезе кроў і плямы яркія флажкоў...

Досыць мне паслухмянасці! - Ходу
За флажкі! Прага волі мацней!
Толькі ззаду я чуў з асалодай
Крыкі здзіўленых мною людзей.

Прагна рвуся з усіх сухажылін!..
Не! Мы сёння не тыя ваўкі!
Атачылі мяне! Акружылі!..
Ды ні з чым засталіся стралкі!

Там паляваньне на ваўкоў! Там паляваньне!
Ату драпежнікаў, старых і шчанюкоў!
Крычаць загоншчыкі, шалеюць псы з браханьня!
На сьнезе кроў і плямы яркія флажкоў...