Жазмыш болгон жамандыкты сүйбөймүн,
Жадабаймын мен эч качан жашоодон.
Жазда, жайда, кышта, мейли күздөбү,
Жакпайт мага жаратпасам шаңдуу обон.

Шылдыңдаган сындоолорду жактырбайм,
Шаттыкка мен ишенбеймин, жана да -
Жактырбаймын уурданып артымдан,
Жазган катым окуп жатса жат адам.

Жактырбаймын - толук эмес, жартыны,
Же сүйлөгөн сөздү бөлсө, шаштырып.
Жаман көрөм - атса адамды артынан,
Жакын такап атканга да каршымын.

Жек көрөмүн боолгологон ушакты,
Жалган сыйды, күмөнсаноо илдетин,
Же - жөнү жок калжаңдаса ынсапсыз,
Же сындырса темир менен айнекти.

Кекирейген токкурсакты жек көрөм, -
Кабылганың жакшырак го кырсыкка.
"Урмат" сөзү унутулганга өкүнөм
Урматталат каршы чыккан чындыкка.

Канаттарды көрсөм сынган, кайрылган -
Кайгыруу жок менде, анткен себебим:
Жакпайт мага зөөкүр дагы, алсыз жан, -
Жалгыз гана Машаякка кейиймин.

Корккон кезде жакпайм өзүм өзүмө,
Күнөөсүздөр запкы тартса өкүнөм.
Кирбесе дейм эчким ички дүйнөмө,
Кирип алып түкүрүшсө жек көрөм.

Мага жакпайт ареналар, сахналар:
Миллиондун баасы бир сом бул жайда.
Мейли болсун чоң өзгөрүү бир далай -
Мен эч качан жакшы көрбөйм мындайды!