Борынгы паркет - идәнгә
Шәмнәр моңланып бага,
Эполетларның көмеше
Җилкәләремә ага.

Агонияда шашкандай,
Чайкала алтын шәраб...
Киләчәкме, узганнармы -
Барысы була харап.

Соңгы мизгел яшәешен
Тоеп, болан талпына -
Үзе дә сизмичә, керә
Үлем уты залпына.

Кемдер мылтыгын төбәгән
һич гаепсез садәгә.
Барысы да була харап -
Явызлык җиңсә әгәр...

Кемдер усал һәм бик оста,
Котырып, күңел ача -
Җәясеннән утлы уклар
Шәфәкъ түренә чәчә.

Кичке моңнар давылында
Тавышлар кабатлана...
Барысы да булса харап -
Өметләр килсен яңа.