Тӧрыт укшальмытӧдз ковги,
кык план вевтырті, и вот
Суйӧрсай командировка
меным вичмодіс завод.

Душын пожъёвтчи ме кызсӧ,
сёйи тшынӧдӧм сын ёс.
Инструктаж месткомын кывзі,
мый сэн позьӧ да мый оз.

Сэні бытыс налӧн бурджык
миысь чут,
Сідзко, лолыд мед оз курды,
асьтӧ куг.

Сетіс лыддьыны брошюра,
йндіс мог,
Мед эг ов сэн шома юрӧн
миян ног.

Вок моз бравгис мекӧд ладу,
нем эз соссьы ни эз веж,
Кыдз сэн олӧ демократыд,
мыйся польскӧй Будапешт.

- Налӧн ставыс дзик мӧд ногӧн,
понтӧ ӧтчыдӧн он сёй,
Кыдзкӧ видлы найӧс,
вокӧ, пыдди пуктыны кӧть войт.

Водка вӧзъясны кӧ гадъяс,
эн и чайт:
Ог, шу, вокъяс-демократъяс,
сӧмын чай.

Налысь козинъяс эн травит,
бергӧд ныр,
Шу, мый татшӧми добраыд
миян тыр.

Нӧшта шуис: «Ов сэн вӧлю,
сьӧмтӧ видзты, но эн дур,
Тэ смотри, мед лов эн нӧльышт,
тшыглы овны абу бур.

Будапештыдлӧн, ме шуа,
сэтшӧм кад оні - он тӧд,
Гашкӧ, вӧзъяс: «Сёйӧй, юӧй»,
либӧ певнад лоан пӧт».

Ок, ме сэтчӧс рынок вылӧ
кежала,
Немеч-румын аньяс вылӧ
видзӧдла.

Демократкаыд пӧ сійо, -
шуӧ ёрг, -
Сӧвет гражданалысь киӧ
грӧш оз кор.

- Буржуазнӧй сӧсыд кӧвтчӧ,
сідз и сибдӧ, быттьӧ гут,
Видзчысь, медым тэн эз кӧвъясь,
бокӧ ветлыны эн кут.

Винёв вир-яя шпиёнка,
вӧтлан - локтӧ, синмыс би,
Шу, мый татшӧм оласногысь
важӧн човтчылім нин ми.

Найӧ сюсялӧны, пеж гаг
кодьӧсь дзик,
Шасть купеад, тэ и чайтан,
мый мужик,

Но а коскас дзебӧ бомбаа
корсет...
Тӧдмав бура, энь ли ай тэнад
сусед.

Тан ме вежорті: «Ог юав,
пола, бурыс нем оз ло.
Кыдзи - тӧдмав? Платтьӧ улас пыран -
пычиктас кӧ лов?»

Но инструктор зонмыс ушлӧй,
аддзылӧма ассьыс пай!
Вай пӧ бӧр ми сэтчӧ вуджлам,
восьтам наян суйӧрсай.

Он кӧ вежӧрт, мый и шуны,
бокӧ кеж:
Ме болгара дорӧ муна...
Будапешт!

Лоӧ гӧрӧд, сійос разьны
абу дыр.
Но эн нӧйт, а видлы вежӧрт,
сэсся шыр.

Налӧн кыв вылын ме мӧмӧт,
ог гӧд, шуны мый да кор
Эськӧ, киӧ кӧ мен мӧлӧт,
здукӧн вӧча миян дор.

Но ме абу агитатор,
ме важ пӧльяссянь кузнеч,
Поляк кывъя Улан-Батор
меным дышӧдіс нин, лэдз...

Водім гӧтыркӧд, оз узьсьы:
«Дусь, а Дусь.
Гашкӧ, овла суйӧрсайтӧг...
кылан, тусь?

Ме нӧ ачымӧс мӧй вежа,
абу вын,
Пышъя, налысь ог ме вежӧрт
кыв ни джын».

Дуся узьӧ, быттьӧ ичӧт,
бигудиӧн гартӧм юр,
Ун пыр меным вочавидзӧ:
«Коля, колӧкӧ, эн дур.

Коль, тэ вӧлӧм кӧч кодь полысь.
Юкся тэкӧд. Ладнӧ, узь.
Кызь во чӧж со орччӧн ола,
кыла сӧмын Дусь, а Дусь.

А ӧд кӧсйин, али вуні,
ай-ай-ай...
Бангладешсьыд тэ клеёнка
меным вай,

Сьӧмтӧ ӧтчыдӧн эн бырӧд,
вожа льӧб,
Нӧшта мутисӧ кӧть гырйын
гортӧ ньӧб».

Чӧскыд унмӧ быттьӧ тшуки,
сывйысь Дусяӧс ог лэдз.
Вӧтӧн аддзи, мый кольчуга
дора аслым, щит да меч.

Налӧн муртӧгъяс дзик мӧдӧсь,
колӧ пельтӧ видзны чош.
...Сё венгерка воліс вӧтӧ,
ставлӧн пищальяс да тош.

Аддзи Дусялысь клеёнка,
мугов рӧм,
Бангладешын сюсь шпиёнка
суськис сьӧм.

Румын вокъяс дорӧ муна,
неч он вӧч.
Кывлі, Волга вылысь найӧ,
ми моз стӧч.

Со ӧд бабаыдлӧн сямыс:
туйӧ пета - сьывны дась.
Дӧрӧм утюжитіс - ставыс
сэтшӧм шыльыд, вомӧй пась.

Видза колян, муса цехӧй,
мен быд кӧрттор муса тан.
Видза колян, встречнӧй планӧй,
меӧн вевтыртӧм дай план.

Юи ме, кор петі гортысь,
чистӧй спирт,
Сутшгъялі аэропортӧдз,
шоммис вир.

Сувті трап водзӧ, а мышкын -
энь и ай:
«Кодлы миянӧс тэ колян,
Микулай!»