Яр боюнда, учурумнынъ энъ четинде - кенарында
Орьме къамчы сильтештирип атларымны айдаштырам...
Манъа ава етмей, - ель, туманны ичиме ютам, -
Махв олувнынъ джошкъунлыгъы иле дуям: гъайып, гъайып олаятам!

Яваш олунъ бираз, атлар, ашыкъманъыз!
Къатты орьме къамчыгъа къулакъ асманъыз!
Не ичюндир бу атларым яман асав -
Йырлап етиштиралмадым, къысмет дегиль экен яшав.

Атларымны суварырым, сонъ бейтимни де йырларым -
Учурымнынъ кенарында бираз, бир ань даа турарым...

Махв олурым - бир пуф киби боран мени учураджакъ,
Саба мени алып кетерлер чаналарда къар устюнде, -
Ёртуп дегиль, эй атларым, ашыкъмадан юрип анджакъ, -
Узайтарсыз сонъ ёлумны бараджакъ сонъ мензилиме!

Яваш олунъ бираз, атлар, ашыкъманъыз!
Къатты орьме къамчыгъа къулакъ асманъыз!
Не ичюндир бу атларым яман асав -
Йырлап етиштиралмадым, къысмет дегиль экен яшав.

Атларымны суварырым, сонъ бейтимни де йырларым -
Учурумнынъ кенарында бираз, бир ань даа турарым...

Келип чыкътыкъ: Юдже Алла узурына кечикильмез, -
Аджеп, ничюн ачув сеснен йырлай анда меляйкелер?!
Я да бу сес чанъчыкъларнынъ агълав окесими?
Я да меним: тез чапманъыз, деп къычыргъан серт сесимми?

Яваш олунъ бираз, атлар, бираз яваш!
Ялвараман, налгъа къувет берип учманъ!
Не ичюндир бу атларым яман асав -
Яшап тоялмадым, ах, сонъ сефер йырлап тойсам!

Атларымны суварайым, сонъ бейтимни де йырлайым -
Шу учурум якъасында ич олмадым бир ань даа турайым...