Айтылгъан уьч авлия
Бирче ёлугьуп бир гюн,
Уллудан эришген дей,
Чюйре этип агъын-гёгюн.

Бири айтгъан: "Менмен бузукъ,
Бирев ёкъ мени оьтеген.
Тишим сама чыкъмагъан,
Гьакъылым гёрсетеген!"

Къой да, сен авлия деп
Эшитмегенбиз атынг.
Тишинг чыкъмагъан булан
Чыгъа чы оьзге затынг.

Бири шишген гёзюне
Баса туруп аясын:
"Мен герюп болмайман, - дей, -
Адамланы дюньясын".

Авлия да инанмас
Бу гьайгев сёзлеринге,
Гёрюн болмай болгьан сонг,
Дарман эт гёзлеринге.

Бири айта, гьайгевлюгюн
Гёрсетгендей алданокъ:
"Яшав деген не затдыр -
Тюк чакъы англавум екъ!"

Етишмей буса, гьайгев,
Сагъа накъыра-зырнав,
О авлиялыкъ тюгюл -
Къулакъларынг сангырав!

Муна булар, ёл битип,
Денгиз ягъагъа етген.
Онда бир алим болгьан
Бош бочкеден къош этген.

Алим авлияланы
Тергеп чыгьып бир гёзден,
Оланы таныйгьанын
Айтып билдирген тезден.

Къырда токъалашдыгъыз,
Къавгъа салдыгьыз уьйде...
Бирден-бир бузукъ болмай,
Яшагъыз шу бар кюйде.

Къайтыгъыз, деген алим,
Маслагьат болгьан сёзю.
Ким нечик авлиядыр -
Биледир гьар ким оьзю.

Алим къошунда ята,
Аягъын аста созуп,
Уьч авлия да къайта,
Болмай бир-бирин озуп.

Хонтурлана, эсге алып
Алим гьакъыл бергенин:
"Айтмады, дей, дюньяны
Бузукълар гётергенин".

Оьзлер де англамагъан
Ким угдургьан, ким утгъан.
Олар уьч гьаким болгъан
Гьукуматны башын тутгъан.

Уьч гюнден от тюшген дей
Шо алимни къошуна.
Туснакъ уьй гьали ону
Гелемикен хошуна?!