Ттулмур бущи чиха бакъар лавхьхьусса -
Чарттайх, щинайх, хьхьемайх бигьлай нанисса...
ЦIа дувай, бур учай на юргъа бусса,
Буну тIий ттул бущи экьинанисса.

Так мудан бурттигьу уссар ттул бянив.
Бишлай уссар чуллайх нихъри цIалхъанну.
Ттуннив ччива лечлай илхъилул дянив,
Я кIили, я хьхьури дакъа, тархъанну.

Дурккун дакъассаксса хьуйлува ххаржан,
Ганил щийнчIав зарал биянгу къабай.
Вана мютIи дурну хьхьурттарайн ттул жан,
Вана кьацI бурхIулттал кIиххябуккавай.

Ттул бурхIай щавурду шайссар ччя-ччяни.
Зурзу тIийгу дуссар ттул иттархъенну...
Ттуннив ччива лечлай илхъилул дянив,
Я кIили, я хьхьури дакъа, тархъанну.

ХIакьину на ччалли буккантIиссара.
Ххув хьунтIиминнувух цIа хьхьичIну дуссар.
Багьлулгу бюхттулссар бяст-ччаллил ара.
Ттухлугу хирхи тIий бурттигьу уссар.

Вана тти бищавай мархь ттул хъурттарайх.
Тайнна вев-гьарай тIий гьалаксса агьлу...
Ттуннив ччива занай щюлли бизанттайх,
ЩийнчIав къамютIисса кьинирдал шагьну.

Хъит тIий, кIибуцавай, бавчуссар дучри,
Гъирарал ва сситтул вибуцIин бувсса.
Личлачигу бувну чIаннала чIучIри,
Бавчуссар, бакьиннин хьамарал бурса.

ЦIакьсса цIа дусса ур ттуйсса бурттигьу,
Бусала хьуну бур мунал гьунардал.
Ттуннив занай ччива, ттуйнма мютIину,
Дазу-зума дуллай илкинсса ардал.

Юх, левкьун насийча мусил зунттурду,
АьщучIан бучIанна хъиривппа-хъирив.
На вин зана банна мурхьхьал чуттурду,
Хъап тIий личIан анна аршилул хъирив.

Бивщунни гюнгутIи, парх кунни гьавас,
Пахрулий гьаз хьунни ттул кIиллувума...
Агь, ттуннив ца ччива илкинсса гьава,
БивчIангу, буккангу, илхъилий буна.

Вагь, цири ттун хьумур, щилли ттул балжин
Ттуща зехлахисса? Къахъанай бурхха
Ххувшаврил аьщучIан къабучIан цалчин.
Къабитлай бурахха ххув къахьун чурххал.

Тти цири на байсса? Щях ищун анна
КIиллуву ххаралий лахъну гьаз хьума.
КIутIу тIий кьамагу, чIун ххинил данна,
ИлхъилуцIух нава нанисса кунма.

Вана, бувкIра цалчин. Ивщума тIурча,
Хъап-щап тIий, най уссар ххуллийх, ххиттувух...
Багъишлагу бара, ххувшаврил мурчал
Бивщуну тIий гьавас цал ттигу ттувух.