Ихьтин гьава акъатна чаз кьисметдай: Гьуьл дерин я чи гимийриз бес кьадар. Цаву гьуьлуьз абивал гуз гьуьрметда. Ихьтин садвал акурла гьикI сес кьадач! Ажеб тешпигь тушни гьуьлуьн къизгъинвал Пехъивилиз, сеслувилиз дагъларин. Лепейрив гва тик синерин эркинвал, Дерейрин дун жеда гагь-гагь хваларив. Туьнтвилери эхдач ерли эглешвал, Кьве полюсдин гиг я жеди меридиан, Ажеб квахьда и синерал пелешвал, Гуьг гьуьлуьни къаврагьарда мад ви чан! ЧIехи кьисмет-чаз стха, вах я гунуг, Ара-ара гатайтIани гарари. Кьураматри рекьер гузва чаз ачух, Хуьзва вилив цавун жанлу нурари... Чи сифте кам чи рекьерин я эвел. Кар я бирдан, тагъайтIа чи бахтуни, Рехъ дегишда, куьмекарни жеч энгел, Хкаж хьуниз къуллугъда мад вахтуни. Туьнтвилери эхдач ерли эглешвал, Кьве полюсдин гиг я жеди меридиан, Ажеб квахьда и синерал пелешвал, Гуьг гьуьлуьни къаврагьарда мад ви чан! Вуч къакъатна чирда тIурфан ксайла, Живеда ваъ, кьелен лаца гьатнваз. Вилел залан туькьуьл накъвар атайла, Аквада чаз завал чакай катнаваз. Чун - синерал, кьилел ала цавун яр, Чилел хквез легьзе бес я вилериз. Мад къарагъда, мад елкенра твада гар Рехъ давамда, гуж гайитIан къуьнериз. Туьнтвилери эхдач ерли эглешвал, Кьве полюсдин гиг я жеди меридиан, Ажеб квахьда и синерал пелешвал, Гуьг гьуьлуьни къаврагьарда мад ви чан!
© Мердали Жалилов. Таржума авун, 2014