Ккунир дарза аьхир чIуруб шлу ляхин,
Саб вахтнара эргдарзу яшамиш хьуз.
Йисан фаслар сабра ккундарзуз аьхин,
Узхьан шули адарш шад мяълийир пуз.

Куниб дарзуз, фурс апIруган ягьсузри,
Шит касдин гьяйранвалихъ хъугърур дарза,
Ва гьацира - йиз гъюнихъан хълигури,
Йиз кагъзар урхру вахтна, ккунир дарза.

Ккуниб дарзуз гьич сабдиъра гьацIивал
Ва чIюбгъруган ккебгъну айи ихтилат.
Гьич ккундариз кьялхъян гюлле йиврувал,
Машна-маш йивруганра ккундариз зат.

Аьгь апIуз шулдарзхьан гъюдли футнийир,
Шаклувалин камк ва гьюрматнан зазар,
Вая - гьарган гъаршуди хьуз багьнийир,
Вая - рукь либгруган шюше вуш изагъ.

Тухъ дубхьнайи шаксузвал дариз кьабул,
Дици хьубтIан, ужу ву дубгуб паргар.
КIвак кин кайиз, намусназ дириври ул,
Гьюрматнаъ ирчнайиган кIуркIур гафар.

Дюргъну айи хлинццар рякъруган узуз,
ГьакIанди шуладар йиз рягьим чашмиш:
Я гужра, я зяифвалра ккундарзуз,
Анжагъ гьяйиф Христос апIуб хачламиш1.

Ккунир дарза, узук гучI`вал кубчIвруган,
Аьгь гьубкIдариз, ккибтган марццирин хатур.
Ккунир дарза, йиз кIваъ фуж-вуш учIвруган,
Хъа иллагьки - дидиъ абтIруган туту.

Кунир дарза тамашайин сягьнийир,
Душв`ин милйон кепкиз апIура хирда,-
Белки цIиб шул лайикь вуйиб тягьнийир,
Амма узуз даккниб сарун ккун хьидар.