Жендекмере гье гене э гIэтош вешенд,
Сес дуьл - чуьн сес эн сангъи э гъэтгъэ.
Э гъэд жендекме зигьисдени уьзге мерд -
Зобуне руьхьи у, э тегьер гъэргъэ.

Гьовоймере диренге хьэрмэхьгьо
Ве гуфдиренге: "Гене мухуру", -
Вепичире э ме у мэхьэлгьо
Э гъэстево и вэхьш, и сангъэруй.

Ме, дуимьун, у нисди, нэгI, эслогь.
Лап ингъэдер зурбои ихдилот,
Ки ниомо э фикир Стругацкигьо -
У хэре хунмени, э рагме деригьо.

Хьэсроти у эй дэгъдэгъэ офде -
Гъэлеммере эз дес ведешенде,
Широ эз нуминейме нуьвусьде,
Номусмере, гъирьете фурухде.

Не вирихдем гьич вэхд эз четини.
Салгьош мурав, ме мупоюм муьхькем.
Ниветовум гьич э зиндегуни
Эзу бедневс ме биреире кем.

Вэхд омори - чорере ме офдем
Эй гуьнжолуь воромере э у -
Огъуре э богозме декуьрдем
Ве э раггьо. Хуру, хилос небу!