Үүле багай төнеринге хөңнүм - не чок,
Үргүлчүлээн чуртталгадан шылавас мен.
Хөглүг ырлар ырлавааным эргилдеге -
Хөңнүм - не чок,аңаа ынак эвес - тир мен.

Арын - нүүрүн чидирерге таарышпас мен,
Аян таалал бүзүрел чок, оон ыңай
Эктим ажыр өске кижи чагааларым
Ээгип - харап номчуй бээрге хөңнүм - не чок

Чугаа - соотту үзе кирип, шаптыктаарга,
Чүү - даа чүве чартык боорга, хөңнүм - не чок
Артындан - даа, мурнундан - даа боолаарынга
Аңаа черле удур мен шуут. Шыдавас мен.

Хопту шын деп бүзүреткен чигзинигни,
Холуургактар хүндүзүн көөр хөңнүм - не чок.
Азы кажан дүктү дедир суйбай бээрге,
Азы шилди демир - биле шыяа бээрге

Тода берген бүзүрелди шыдавас мен -
Доктаавайын баар болза, улам эки
“Алдар - ат” деп билиг читкен хомуданчыг
Ажыг хоп - чип, карак чаары хүндүткелде

Сыйлып калган чалгыннарны көрүп каанда,
Ыым келбес, кээргевес мен, чүге дизе,
Албадалга, күш чок боорга хөңнүм - не чок
Азып каапкан Христос харын хомуданчыг

Бүдүжүмде кортук чаңга хөңнүм - не чок
Буруу чоктар эттей бээрге, хараадаар мен
Сеткилимче кирер дээрге, оон - даа артык
Ческинчидир дүкпүрерге шыдавас мен

Элезинниг бедигээшке, кажааларга
Эртинени өртек чокка орнаптарга,
Кандыг - даа бол өскерилге болур болза,
Кажанда - даа аңаа черле таарзынмас мен