Woana na ɔhaw no dε w’aberwa rihwinhwin dodow?
Woana na ɔhaw no dε ntoburo atsew egu wo do?
Woana haw ne ho dε efi hwiir do abɔ famu bio?
Da ase dε eda ho tse nkwã mu.

Ɔyε ɔhaw kεse ma wo dε sε ehyε w’atar ɔnnkɔ wo.
Ɔyε ɔhaw kεse ma wo dε adaaso hun ayε wo kɔdaannda ekosi ahamanakye ndɔnnum.
Ɔyε ɔhaw kεse ma wo dε ifi aborɔsan ntwereba do risian ma obi esun wo.
Kɔ do da ase dε eda ho tse nkwã mu.

 
 
 
 

Nokwar, nkyen yarba ama anomutor ekum wo nyεnko.
Ɔwoara so kɔdaannda ama afɔn ayε atseã.
Ampa ara dε dapεn n’ewiei wɔdze wo kɔtoo ayarsa mpa do.
Naaso kɔ do da ase dε eda ho tse nkwã mu.

Oye, wo ntɔn mu kyerε dε enyim tsiatsia ama afona papa.
W’edwuma asεe mpo a, ɔyε dεn?
Anaa wo bogyaa mu seradze tsindamm mbordo dze yarba rehaw wo?
Kɔ do da ase dε eda ho tse nkwã mu.

 
 
 
 

Mma mfifir ntsew wo dε ehu sεperewa bɔ.
Mma mfifir ntsew wo dε enya amandze ma w’ɔabrε wo saman krataa bio
Mma mfifir ntsew wo dε enya etsiben kakra.
Mpo a, kɔ do da ase dε eda ho tse nkwã mu.

Nokwar, midzi yaw dε, ɔyε mara mo mfomdo;
Ɔyε nokwar ennsi nketse annhyε wo sapɔw mu nsu a, irunntum mbɔ bra da.
Na mbow, me haw kortsee nye dε, mbom na sε meda ho tse nkwa mu a,
Memfa ndaase no mma woana?