Маринаду
Элэ ӈаӈта хэгтэлни хилгэддэ,
Элэ чукичар чибартадда -
Нимкан тэнкэлэн хи тек индинри,
Эдук этэнри хи хөррэ.

Черёмухал ойгичин эдэнду олгадатан,
Удангичин сиренел тикэтнэдэтэн, -
Би хину ями-да эдук хөрудим
Дворецла, тала свирель икэддэн!

Бинивус хаманал миндук нян төрдук
Тысыча анӈанила дяйритан, -
Нян як-та ай ачча эрэк хигидук -
мулгачинри хи тачикан

Эбдэнрэлэ бадикар хилэс ачча бидэн,
Аткиканнюн нянин нэгимэттэтэн, -
Би хину ями-да эдук хөрудим
Ӈэрин теремла нямси нам хаттун!

Ирэк инэӈиду, адыс часту
Минтэки хи нёдинри энтукукэн,
Ок хину би хөрудим төкникэн,
Ӈи-дэ этилэн хину бакра?

Дёрмидим, дёрмин хинду ай бисэкэн, -
Даарам - гу би эрдын эӈии бөрив?!
Чорама дюла миннюн несэлкэн бигэл,
Дворецла нян теремла ни-вул бисэкэн!