Żółte ognie widza we śnie,
bez to chrypia w nocy.
Czekej chopie, jeszcze wcześnie,
rano się zoboczy.

No, a rano w gardle chrypa,
pora niewesoło:
Abo kurzisz staro kipa,
abo żrysz gorzoła.

Ech roz, jeszcze roz,
jeszcze drugi, piąty, dziesiąty roz.
Ech roz, jeszcze roz,
Abo żrysz gorzoła.

Potyn w knajpie pija piwo
na biołyj serwecie.
Dwa gorole patrzom krziwo.
Jo - jak pies na kecie.

Ruby farosz, co w kościele
czorno myca nosi,
ino durch ozorem miele,
a mie zaś ponosi.

Nie czuł żech się cołkiem zdrowy,
to żech wyszoł z doma.
Wszyjstko czorne, żodnyj trowy,
i starzik, i oma.

By choć jedym klombik gupi
był kajś na tym placu,
flaszka piwa bych się kupił,
bo żech jest na kacu.

Ech roz, jeszcze roz,
jeszcze drugi, piąty, dziesiąty roz.
Ech roz, jeszcze roz,
Abo żrysz gorzoła.

W końcu poszoł żech na łąka.
(Nie spotkoł żech Boga).
Za to bąbla mom od bąka,
co mie użarł w noga.

A za łąką, trocha z boku,
jest droga do lasu.
W lesie tyż jak na hasioku:
Wszędzie w ciul marasu.

Kajś za lasem słychać bany,
nie ma kaj się schować.
Świat jest taki porąbany,
że mie boli głowa.

W takim lesie nawet w lato
nic świętego nie ma!
Słuchejcie chopy - Jest ciulato,
i w lato, i w zima!

Ech roz, jeszcze roz,
jeszcze drugi, piąty, dziesiąty roz.
Ech roz, jeszcze roz,
Abo żrysz gorzoła.