Са хылис зы, ихьды меркезди ана,
КьваIр, хьура литхьуд, за ара гъитхьири,
Милициди йыгыд гьадид бадана,
Са рыш, гьаргуд, зас гьад йикIе ирхьури.

Шыв гьаъад риъиди, гьади, гьацIыр диш.
Белке паспорт лаIпшура ад риъий.
БытIраваIлид кьадар зас хъавацIыр диш,
Кьул лувшур, джыбра маннийды йикиси.

Джыбра йыхьыд, подъезд йикIиы хакьыри,
Шыв гьухьуси - зы йиъи са хулиген:
Рагъыр, рышахда за гъаъ сес выъыри,
КеепIири са йыхды калды ресторан.

Рышед бытIравалды улис гьувгуйне,
Дуьньяды зас "Гьарай!", кывъас, йыгарай,
Сыние рышес улидбыр гьыъыйне -
Сылабыр сытIа гьаъара гимарай.

Танга гъивирхьре за, хъуъ ладжакъыр,
За джус хьыва лыIхды икра лирхьири,
Ара кид наIгьнибыр, рышес заказ выр,
Ки джыбрана "Журавли" за хъаIвагъыIри.

Выш йаIква йыхыIр, за йикI ачых гьыъыр,
Рышес изды дерди-къайгъу ваъара.
ХьаIли, сынйды джиб за ачых выъыр,
Зас ридж рыгадийкла дерди ваъара.

ХыцIа йишир, шарфа ешелбыр аркIыр,-
Шыв гьаъасдихь, аман! Зас вы рыгара,
Джу, хьуйне, изды язухъ, зас джан выъыр:
За вада кьаIрене выси, - рухьура.

За, джагварды, рышед хъуIшбыр етере, -
Эбир лывырсара, изды гийкьыр ад:
Милициди ад риъй гьад йис хьуйне,
Джан маса вылцIара хьур ара харкьыр ад.