Джус джывгад чIел, вырды сухьруды ваъад,
Гиме лузур дустад йыкьаIхла ваъад,
МукъуIд гьаIдатдикла иянат гьаъад,
РыкъаI гыхыIр, салам выр зас йыгардиш.

Викьире ад тылыед язухъ джаъад,
Йикьид, гьухуд йишийне гьеч хаджаъад,
Зайифды етимешихьван ладже ад,
Мийман йишир, хала йиркьыр йыгардиш.

Тек изды хал, тек изды хизан, - рухьуд,
Заала хъуъ, джыгама хьед литхьуйхь, - рухьуд,
МукъуIйхь цIай китхьуйне гъаъ гъа аIджагъуIд,
Йикьире ки, хыла дарман выгардиш.

Манут ха хьур, хадишнийы йаIхъ гьаъад,
Вырды бармак гъана дамахбыр гьаъад,
Вырды кагъат лаIхъаIшур кьыле гьаъад,
Къурахас югъал йишир ки йыгардиш.

Белке эгер гьад кьисмат зас выхьуна,
Зы ки гьад кьисмытды рази йишихьуна,
Кьимет ки зас халкьдид наIгьнет йишихьуна,
ГьуIмур гьасад улу ливхьир, выгардиш!