Иьнтиммай виш, лобур, хъагъ арши тIо зон,
Ххулиши гвас аммул - ма веж парадокс:
ВеркIурши кашиш вир Римлин папаши,
ВаркIурер кви синтIу къварид-бокслак як.

Теник инниб бикъмул блатнойли соли,
Керттут эттихъерши харххэбттили би.
Кьаьнахут шьорталлуб Италияла
Папан бихъв сас кертту кандидат хутIу.

ХIеп, тIоттут сагIанна этIнез тIакIани,
ТIейттан зон ххубуна Ватиканнак гвар!

Кашиштилчей ссобот пиштIан къиовли,
ТIи-кIиши Ватикан ххи букмул гьани!
ТIиьттовена ненав Римлин Папаши
Ловвейвуту поляк, иславян яму.

Нарофоминск, туснакъ, нараттет кана.
Бис гIуммур либартта синшэденчIи вас
Заттищ Римлин Папа квес эвттихъукул,
Гьакъши Мама-кул ас уну доркиркул!

ХIеп, тIоттут сагIанна этIнез тIакIани
ТIейттан зон ххубуна Ватиканнак гвар!

ХIакимкул, арси, тах ботльмелъу ишав,
Гатулин ло лъвана лапIар къисматли.
Ненибу шагьлин тах кураш абттена?!
ХIалалкул тльотIона лабу насрули!

Гьунар битIукуллит шагьли хъол овтта
Ма бона щуттена оссу овкIасма!
Даннащ я? Туркманна ос вакъуна ос
Аятолла кьантттан, кьанттан Хомейни

БаькIли баран довраз барттурши гIуммур
КIуруму босона Тагьранннак хъьвесма!

Кьанттан Америка, кьанттан Азия,
Европа бохошав ххуликул итIу,
Ос бецIотIитту квер, осу кIвануьрхъиьр...
Голда Меир гьани, - ямурмин бикъв сас
Ахулехху нентIу, элтIейтIу синтIав,
ЭбкъбутIи халкъ теник лабейбу бишав.

Кьиру лур битIиту Моше Даяннин
Щви суна къвеьбосдуб обтльмус бикини!
Гьинц Иранна асттут зари хотIончIи
Нессеневву хIадур Тель-Авивлиши


Волга, Кама ботIав лъаннарши бина
Ишпага-плащлинниб, гьунар бахаттиб.
Вис туснакълин чIахху - Руслан Халилов
Яму вима Мао квасеву кватIтту!