Si en bell puesto, una nueit estrania y plena de zocera,
entrepuzas y yes en a cimbeleta de a muerte,
no t’amagues, no te calles, escacila-me
y t’escuitaré y sabré que ye a tuya voz

Talment cayés d’un balazo en un campo d¡avena,
¡resiste! De camín i acudiré, as mias garras no s’atrallan.
Tornaremos ta l’aire y ta las yerbucias que curan,
pero, no crabutes, ixaugua-te a sangre.

Si yes a caballo viene-te-ne a las quatro suelas,
o tuyo porrocho soro trobará o camín
enta do siempre naixen fuents d’augua viva
que te van a curar ixas feridas.

¿Do yes? Entutau u por un largo camín,
en qué esbarre, u cruce, en cuál crucillada.
¿Talment, remallau, t’afogas en un vaso d’augua
y no trobes a endrecera pa tornar?

Aquí, baixo a nieu, corren con tal pureza as barranqueras
que no trobarás ni inventarás brenca más poliu;
aquí, flors, árbols y matigals no tienen duenyo,
y si se nos antullan, serán nuestros.

Si pa tu ye de mal petenar enlorau dica o chenullo,
por os cillos, descalzo por l’augua con un frío que chela,
viello, acotazau por as aireras, pleno de fumo, sumarrau
por o fuego; como estaigas, confía, viene a poquet, arriba a arrocegons.