Li mei manu nun tremanu chiù;
mi pozzu arrampicari, ora, chiù supra.
Tutti l’appagni chi mi ncuitàvanu
li cafuddai nna lu sbalancu, pi sempri.

Nun ci su’ chiù calùnii pi stari fermu.
Vaju avanti, sciddicannu; ma nun esisti,
a lu munnu, pizzu di muntagna
chi nun si pò cunquistari.

Di tutti li passi ancora mai battuti
unu avi a essiri lu meu; di tutti li vadi
ancora nun scuperti
unu l’aju a supirari ju.

La nivi ammùccia li nomi
di chiddi chi ci lassaru la peddi, ma
di tutti li passi nfin’astura nun battuti
unu avi a essiri lu meu.

Cca tuttu lu pinninu è tapizzatu
di lu spirlucìu azzolu di li ghiacci
e lu granitu addifenni lu sigretu
di qualcunu chi ci stampau li rasti.

Vola lu me sonnu;
supranìa sti cimi
e m’addinocchiu a la nnuccenza
di la nivi e di la palora.

Lu tempu passa. Passa lu tempu.
Ma, pi tutta la me vita, na cosa mai
e poi mai mi la pozzu scurdari: fu cca chi
truvai la forza di vinciri ogni me dubbiu!

L’acqua ddu jornu mi ciuciuliava
a l’aricchi: “La fortuna t’accumpagna!”
Ma chi jornu era?
Ah, sì: un mèrcuri!