Si a qualchi banna, nta na notti stranera e ncueta,
t’arritruvassi longu longu ‘n terra menzu mortu,
nun t’ammucciari, nun ti stari mutu, vucìa forti,
chì la to vuci junci finu a mia e ju l’arricanùsciu.

Stinnutu macari a la campìa cu na badda nta lu pettu,
risisti! Mi mettu a cùrriri, a cùrriri senza chi li mei jammi
sentinu la stanchizza, e turnamu arrè ddà, unni l’aria
e l’ervi su’ salutivi. Ma tu nun mòriri; nun muddari.

Si si’ ‘n sedda a un cavaddu vai a brigghia sciota;
lu cavaddu è di razza e, nta un nenti, pigghia la strata
pi ddi lochi unni l’acqua viva
di li funtani sana ogni firita.

Si’ nta na strata aperta o nta una ca nun spunta?
Si’ nta un biviu o nta un crucivia?
Si’ stancu, disfizziatu, cunfusu
e pirdisti la via di lu ritornu?

Cca scurrinu li ciumari sutta la nivi cu tali purizza
chi nun esisti e nun si po’ mmaginari cosa chiù bedda;
cca li ciuri, li fratti e l’arvuli nun appartennu a nuddu
e sunnu nostri, nostri si vulemu.

È difficili lu caminu, cu lu fangu finu a li dinocchia,
scàusu ntra li petri puntuti, nni l’acqua gnilata,
e tu nvicchiatu, abbruciatu di lu ventu, di lu fumu, di lu focu;
ma, comegghè, strascìnati, striscia, arriva ‘n casa.