Quella seia no beveivo e no cantavo,
amiavo solo la, con euggi spalancæ,
coscì comme fa i gardetti incantæ;
ma quello che primma o stava con lê
o m’à dito: "Vanni, vatene via,
o m’à dito: " Vanni, vatene via,
leviti d’inta testa ògni idea".

Quello che primma o stava con lê
o l’à comensòu a insultâ e minaciâ,
no mò-u pòsso ascordâ, no eo ciocco,
quand’ò deciso che saiæ andæto
lê a m’à trategnûo co-in gesto:
lê a m’à trategnûo co-in gesto:
“No andâ via, l’é ancon fito”.

Quello che primma o stava con lê
o no m’à ascordòu, l’é ciæo;
in giorno d’ötunno, mentre eo insemme
a ’n amigo, me l’ò atrovæ de fronte.
Ean in gruppo, nisciun ch’o silava;
Ean in gruppo, nisciun ch’o silava;
stavan in gruppo, e ean in eutto.

Aivo o cotello e ò dito: "Va ben,
no m’aviei tanto façilmente.
Avanti, bastardi, fæve avanti
perché doviæ crepâ pe ninte?"
E aloa son stæto mi o primmo a corpî
E aloa son stæto mi o primmo a corpî
perché l’é coscì che se deve fâ.

Ma quello che primma o stava con lê
o l’à fæto pe ’n davei ’na bella frîtâ,
o l’à fæta pe ’n davei, no son miga balle.
Quarchedun o s’é atacòu a-e mæ spalle,
Valjucha o l’à sbragiòu: “Difendite, sciù,
Valjucha o l’à sbragiòu: “Difendite, sciù,
Difendite” o l’à sbragiòu. L’ea tardi, òramai.

Pe eutto disgraçie ’na sola rispòsta,
anche in galea gh’é ’n lazaretto,
me son ritrovòu disteizo in sce ’n letto,
pe longo e pe largo m’an tagiòu.
Diva o mego: “Coraggio, cao mæ”.
Diva o mego: “Coraggio, cao mæ”.
Diva: “Coraggio”. E mi ò tegnuo duo.

Parlando do destacco, l’é stæto ’n solo momento,
a no l’é stæta li a aspêtame, lê a se n’é andæta,
ma no gh’o portòu risentimento,
lê, se capisce, mi a perdonn-o.
Ma quello che primma o stava con lê
Ma quello che primma o stava con lê
lê no-o poriö scuzalo mai.

Lê a perdonn-o, a perdonn-o, però
quello che primma o stava con lê
quello che primma o stava con lê
in giorno ò l’atro l’incontriö.