Chi no semmo in cianûa, no gh’é tenperatua che tegne,
valanga dòppo valanga o deruâ de prie
o no a finisce de rebonboâ.
Se porieiva deviâ e e giâ in gîo a-o recanto
ma pigemmo a stradda più nemiga,
reizegoza comme ’n percorso de goæra.

Chi no é mai vegnuo, chi no à mai areizegòu
no s’é mai misso a-a preuva.
E anche se zu in basso o l’à mostròu do valô
in basso no ti peu òservâ, qualonque cösa ti ti fæ,
inte tutta a vitta, a no l’é manco ’n pitin
de sta belessa infinîa.

Ninte reuze scarlatte ne frexetti de desmûo.
No pâ pe ninte ’n monumento
a miagia che inte sto momento chi a ti regalla a carma,
Comme sciamma perenne a luxe o giorno ciù cado
De d’âto a-o giasso smeraldo
da çimma che no t’æ conquistòu.

Lasciæli dî, sci, lasciæli dî
che tanto nisciun meue mai pe ninte.
Megio coscì de chi meue de vodka ò de rafreidô.
Quarchedun atro vegniâ scangiando a comoditæ
Pò-u reizego e a schenn-a stocâ.
O vegniâ a continoâ a stradda che t’æ prinçipiòu.

Ti gh’æ ’na miagia davanti, alon, stemmo atenti!
No fâ conto in montagna in sciâ sòrte benigna,
in sciâ pria, in sciô giasso ò a ròcca:
niatri solo se confiemmo in sciâ fòrsa da man,
in sciâ man de l’amigo e in scî ganci ben ciantæ
e preghemmo perché a seguessa a no manche.

Scavemmo scæn, no in passo inderê
e pöi e tenscioin fan tremâ e zenogge,
E o cheu ch’o picca pe sciortî da-o peto e botezâ in sciâ çimma.
E ti t’ê sodisfæto, tutto o mondo o l’é a-i teu pê
e solo ’n pö t’inviddi chi ancon à in vista
’na neuva conquista.