In kou d’poin, in not kou,
Ankor in kou épi
Boris Boutkéev (Krasnodar)
I plass son kroshé.

A la li pou kale a moin dann mon koin
Tou zis si mi ansorte a moin,
In kroshé, a la moin a tèr
E mi san a moin faye.

E Boutkéev, li té i pense, an krazan mon mashoire,
K’i fé bon vive, ké la vi él bèl.

I konte a moin sèt é moin lé touzour a tèr
Mon bann péi i plèr tout zot larme.
Mi arlève, mi plonz, mi éskiv
E mi mark lo poin.

Pa vré sa mi garde
Mon kouraz pou la fin,
Mé tape dsi la figuir in ga
Sa, dopi tan pti, moin pa kapab.

E Boutkéev li, li té i pense, an krazan mon bann kote,
K’i fé bon vive, ké la vi lé bèl.

Dann tribine, d’moune i sif, i guèl:
Totosh a li, la pèr li la
Boutkéev i inpoz a moin in kor a kor
E moin mi apiy kont lo bann korde.

Mé li la trouve lo tiktrak, sa in boug la Sibérie sa,
Bann boug la, sa lé borné,
E mi di a li : Zobok,
Sirman ou lé fatigué, ropoz in pé!

Mé li la pa antandi a moin, é li té i pense an souflan
K’i fé bon vive, ké la li lé bèl.

E li kongn touzour, kosto, salopri la!
Mi o i sava mal tourné,
Parské la boks, sa la pa batay,
Sé spor bann boug gabié, tousala...

A la li pou tapé: ène, dé, troi,
Epi li tonm tousèl
E larbit i lève mon bra
Lo bra moin la pa tape avèk.

Li lété la, a tèr, é li té i pense ké la vi lé bèl,
Bèl pou in pé, mé pou d’ot inn tiok.